रुसले युक्रेनविरुद्ध खतरनाक हतियारको प्रयोग गर्न थाल्यो, परमाणु बमको प्रयोग गर्ने खतरा

युद्ध लम्बिँदै जाँदा रुसले युक्रेनविरुद्ध खतरनाक हतियार प्रयोग गर्न थालेको खबर बाहिरिएका छन् ।  खतरनाक हतियारको प्रयोग गरे सँगै परमाणु बमको प्रयोगको सङ्केत पनि हुन सक्ने विश्लेषकहरू बताउँछन् । रुसले ४ चैत्रमा पहिलो पटक किन्जाल हाइपसोनिक मिसाइलको प्रयोग गरेको छ । हाइपसोनिक हतियार प्रयोग गरे सँगै परमाणु हतियार समेत प्रयोग गर्ने त हैन भन्ने आङ्कलन सुरु भएको बताइन्छ ।

रुस र युक्रेनबीचको युद्ध लम्बिदै जाँदा रुस खतरनाक हतियारको प्रयोगमा बढिरहेको छ । अर्कोतर्फ, अमेरिकासहित नाटो देशहरुले रुसविरुद्ध कडा नीति लिदै आएका छन् ।

युक्रेनलाई युद्धक विमान सहयोग दिनेबारे नाटोमा छलफल बढेको छ । पोल्यान्ड त्यस्तो सहयोग दिन तयार भइसकेको छ । नाटो रुससँगको युद्धमा प्रत्यक्ष संलग्न होस् भन्ने चाहन्छ युक्रेन ।

पोल्यान्ड पनि त्यही चाहना राख्न थालेको छ । यो भनेको रुससँग नाटो युद्धमा भिड्नु हो । रुसमाथि आर्थिक प्रतिबन्धहरु पश्चिमाहरुले लगाएका छन् ।

रुसलाई किनारा लगाउँदै लगिए गम्भीर अवस्था आउने चिनियाँ भनाई सार्वजनिक भएको छ । चिनियाँ उप विदेशमन्त्री लीले आणविक शक्तिलाई किनारा लगाउनुलाई अकल्पनीय खतराको सम्भावना भनेका छन् । नाटोले अहिलेसम्म युद्धमा प्रत्यक्ष संलग्न नहुने बताइरहेको छ ।

युक्रेनलाई उडानरहित घोषणा गर्न मानेको छैन । तर, कुनैपनि बेला निर्णय फरक हुन सक्छ । अर्कोतर्फ, रुसले नाटो देशहरुलाई पनि आक्रमण गर्न सक्ने खतरा रहेको छ ।