शैक्षिक सत्रदेखि पढाइ सुरु नभए अनशन बस्ने धनगढीका मेयर हमालको चेतावनी

धनगढी – धनगढी उपमहानगरपालिकाका प्रमुख (मेयर) गोपी हमालले शहीद दशरथ चन्द स्वास्थ्य विज्ञान विश्वविद्यालय (गेटा) मा यसै शैक्षिक सत्रदेखि एमबीबीएस कार्यक्रम सञ्चालन नभए आफू अनशन बस्ने चेतावनी दिएका छन्।

सामाजिक सञ्जालमार्फत एक भिडियो सन्देश जारी गर्दै मेयर हमालले सरकार र डा. गोविन्द केसी पक्षबीच गेटा विश्वविद्यालय सञ्चालनबारे छलफल भइरहेका बेला सुदूरपश्चिमका नागरिकको दशकौँदेखिको आकांक्षालाई थप अन्योलमा नराख्न आग्रह गरेका छन्।

गेटा विश्वविद्यालय सुदूरपश्चिमको शैक्षिक र स्वास्थ्य विकाससँग जोडिएको महत्त्वपूर्ण परियोजना भएको उल्लेख गर्दै उनले अब भौतिक संरचना निर्माणभन्दा पनि प्रत्यक्ष शैक्षिक गतिविधि सुरु हुनुपर्नेमा जोड दिएका छन्। विश्वविद्यालयका पदाधिकारी नियुक्ति वा व्यवस्थापकीय बहसभन्दा विद्यार्थी भर्ना र पठनपाठन सञ्चालनलाई प्राथमिकता दिनुपर्ने उनको भनाइ छ।