युक्रेनको मारिओपोल शहरमा पुन अस्थायी युद्धविराम

युक्रेनको मारिओपोल शहरमा पुनः अस्थायी युद्धविराम घोषणा गरिएको छ । मारिओपोल शहरमा स्थानीय समय अनुसार आइतवार बिहान १० बजेदेखि साँझ ९ बजेसम्मका लागि अस्थायी युद्ध विराम घोषणा गरिएको त्यहाँको सीटी काउन्सिलले जनाएको छ ।

यसअघि पनि सो सहरमा रुसी सेनाले युद्धविराम घोषणा गरेको थियो । सर्वसाधारणलाई त्यहाँबाट सहज ढंगले अन्य क्षेत्रमा जान र अन्य मानवीय सहायकता लागि भन्दै रुसी सेनाले युद्धविराम घोषणा गरेको थियो । तर, रुसी सेनाले बम हमला र गोलाबारी गरेको विवरण सार्वजनिक भएको थियो ।

यस अघी रुसी पक्षले दुईवटा शहरका लागि सहमति गरिएको अस्थायी युद्धविरामलाई लागु नगरेको भन्दै सो कार्य स्थगित गरिएको युक्रेनी अधिकारीले बताएका थिए ।

रुसले भने युक्रेनी राष्ट्रवादीहरुले नागरिकलाई शहर छाड्न नदिएको आरोप लगाएको छ । रुसले मारिओपोल र भोल्नोवाका शहरमा मानवीय सहायता द्वारमा अस्थायी युद्धविरामको घोषणा गरेर जनतालाई बाहिर निकाल्ने प्रयत्न गरेको बताईएको छ ।