युद्धविराममै रुसले गर्‍यो हमला, युक्रेनका राष्ट्रपतिले अमेरिकासँग मागे हतियार

रुसले युद्ध विरामको पालना नगरेको युक्रेनले आरोप लगाएको छ । रुसले हमला जारी राखेपछि युद्धग्रस्त क्षेत्रबाट मानिसहरुलाई सुरक्षित स्थानमा पठाउन समस्या भएको युक्रेनी अधिकारीहरुको भनाइ छ ।

रुसले शनिबार युक्रेनका दक्षिण पूर्वी दुई शहर मारियुपोल र भोनोभाखामा अस्थायी युद्ध विराम घोषणा गरेको थियो । तर आधा घण्टाभन्दा कम समय मात्रै रुसले युद्ध रोकेको युक्रेनी अधिकारीहरुलाई उद्धृत गर्दै बीबीसीले जनाएको छ । जसका कारण हजारौं नागरिकलाई सुरक्षित तरिकाले बाहिर निकाल्ने काम प्रभावित भएको छ ।

मारियुपोलका उपमेयर सग्रेइ ओर्भोभले बीबीसीसँग भनेका छन्, ‘रुसी सेनाले आधा घण्टाभन्दा पनि कम समयका लागि हमला रोक्यो र फेरि लगातार बमबारी सुरु गर्यो । मानिसहरुलाई बाहिर निकाल्न तयार गरिएको बसहरुमा पनि आक्रमण गरिएको छ ।’

उनले भनेका छन्, ‘रुसी सैनिकले शहरलाई ध्वस्त बनाइरहेका छन् । युक्रेनीहरुलाई मारिरहेका छन् । सडकमा छरिएका लाशसमेत हामीले उठाउन पाइरहेका छैनौं । आक्रमणमा कति जना मारिए भन्नेसमेत जानकारी छैन । यहाँ सकुशल अवस्थाका भौतिक संरचना सायदै होलान् ।’

रुसले युक्रेनमा आक्रमण सुरु गरेको आज ११ औं दिन हो । राजधानी किएभको उत्तर पश्चिम क्षेत्रका शहरहरुमा रुसी सेनाले आक्रमण जारी राखेका छन् । इरपिनमा रहेका बीबीसी सम्वादाताका अनुसार यहाँबाट मानिसहरु अति आवश्यक सामानहरु बोकेर सुरक्षित स्थानमा जाने कोसिस गरिरहेका छन् । बीबीसीका अनुसार इरपिनमा शनिबार रातभर पनि रुसले आक्रमण गरेको छ ।

रुसी सेना राजधानी किएभतर्फ अघि बढ्ने प्रयास गरिरहेका छन् । उनीहरुसँग युक्रेनी सेना र स्वयंसेवक लडाकुहरुले प्रतिरोध जारी राखेका छन् ।

यसैबीच युक्रेनका राष्ट्रपति भ्लोदिमिर जेलेन्स्कीले अमेरिकी संसदलाई सम्बोधन गर्दै युक्रेनलाई फाइटर जेट दिन र रुसबाट तेल खरिदमा प्रतिबन्ध लगाउन माग गरेका छन् ।