बाइडेनले शत्रुतापूर्ण नीति लिए : उत्तर कोरिया

अमेरिकी राष्ट्रपति जो बाइडेन शत्रुतापूर्ण नीतिका साथ अघि बढेको आरोप उत्तर कोरियाले लगाएको छ ।

बाइडेन प्रशासन उत्तर कोरियासँगको सम्बन्धलाई लिएर रणनीतिक योजनामा लागेको उत्तर कोरियाको विदेश मन्त्रालयले आरोप लगाएको हो ।

उत्तर कोरियाको विदेश मन्त्रालयका अनुसार वासिङ्गटनबाट भएका पछिल्ला टिप्पणी तथा गतिविधिहरुले राष्ट्रपति बाइडेन शत्रुतापूर्ण नीति कायम राख्ने पक्षमा छ ।

गत साता राष्ट्रपति बाइडेनले उत्तर कोरियाको परमाणु कार्यक्रम विश्वव्यापी सुरक्षाका लागि गम्भीर खतरा भनेपछि उसको यो धारणा सार्वजनिक भएको हो ।

उत्तर कोरियाको विदेश मन्त्रालयले आइतबार जारी गरेको वक्तव्यमा परमाणु कार्यक्रमलाई लिएर अमेरिकी राष्ट्रपति बाइडेनले संसदको संयुक्त शत्रमा गरेको टिप्पणी ठूलो गल्ती रहेको बताएको छ ।

उत्तर कोरियाले आफ्नो परमाणु कार्यक्रम बन्द गर्नु पर्नेमा अमेरिकाले दबाब दिँदै आएको छ तर उत्तर कोरियाले पहिला आफूमाथि लगाइएका प्रतिबन्ध फुकुवा हुनु पर्ने सर्त राख्दै आएको छ ।