दोस्रो टी-ट्वान्टीमा पनि अष्ट्रेलिया पराजित, बंगलादेश ५ विकेटले विजयी

अष्ट्रेलियाविरूद्धको टी-ट्वान्टी सिरिजमा घरेलु टिम बंगलादेशले लगातार दोस्रो जित निकालेको छ ।

बुधबार ढाकामा भएको खेलमा बंगलादेशले अष्ट्रेलियालाई ५ विकेटले पराजित गरेको हो ।

यस जितसँगै बंगलादेशले अष्ट्रेलियाविरुद्धको पाँच खेलको सिरिजमा २-० को अग्रता बनाएको छ ।

अष्ट्रेलियाले दिएको १ सय २२ रनको लक्ष्य बंगलादेशले १८ ओभर ४ बलमा मात्र ५ विकेट गुमाएर पूरा गर्‍यो ।

बंगलादेशको जितमा आफिफ होसेनले अविजित रहदै ३७ रन बनाए । नुरुल होसेन २२ रनमा अविजित रहे । यस्तै शकिब अल हसनले २६ रन जोड्दा मेहदी हसनले २३ रन बनाए ।

अष्ट्रेलियाका मिचेल मार्श, जोस हाजलउड, एस्टन अगर,एडम जाम्पा र एन्ड्रयु टेले एक एक विकेट लिए ।

यसअघि पहिले ब्याटिङ गरेको अष्ट्रेलियाले २० ओभरमा ७ विकेट गुमाएर १ सय २१ रन बनाएको थियो ।

अष्ट्रेलियाका लागि मिचेल मार्शले ४५ रन बनाए । यस्तै मोइसेस हेन्रिक्सले ३० रन जोड्दा मिचेल स्टार्कले अविजित १३ रन बनाए ।

यसअघि पहिलो खेलमा बंगलादेशले अष्ट्रेलियालाई २३ रनले पराजित गरेको थियो ।