कोपा अमेरिकाको फाइनलमा नेइमार भर्सेस मेस्सी

ब्राजिलमा जारी ४७औं संस्करणको कोपा अमेरिका फुटबल प्रतियोगिताको उपाधिका लागि विश्व फुटबलका दुई ‘पावर हाउस’ देशहरू ब्राजिल र अर्जेन्टिनाको महाभिडन्त हेर्न पाइने भएको छ ।

अर्जेन्टिनाले कोलम्बियाविरुद्ध निर्धारित समयमा १–१ को बराबरी खेल्दै पेनाल्टी सुटआउटमा ३–२ को जित निकालेको थियो ।

अघिल्लो दिन ब्राजिलले पेरुमाथि १–० को कठिन जित निकाल्दै फाइनल प्रवेश गरेको थियो ।

कोपा अमेरिका क्षेत्रका दुई सबसे ठूला र कट्टर प्रतिस्पर्धी टोलीबीचको फाइनल भेट तय भएपछि कोपाको फाइनल खेलमाथि अब दुनियाँको नजर पर्ने भएको छ । यो केवल ब्राजिल र अर्जेन्टिनाको मात्रै भिडन्त हुनेछैन, यो नेइमार र लिओनल मेस्सीबीचको व्यक्तिगत भिडन्त पनि हुनेछ ।

सन् २०१३ देखि २०१७ सम्म बार्सिलोनामा ४ वर्ष सँगै खेलेका नेइमार र मेस्सी यसपटक कोपाको फाइनलमा एकअर्काविरुद्ध भिड्ने भएका छन् । यसर्थ पनि कोपाको यो फाइनल खास हुनेछ ।