बैंकिङ क्षेत्रले लिड गर्दा नेप्से ३००० माथि, ११ कम्पनीको सेयर मूल्य सर्किट लेभलमा बन्द

लगातार दोस्रो कारोबार दिन पनि उच्च अंकले वृद्धि हुँदा सेयर बजार परिसूचक नेप्सेले ३००० अंकको ऐतिहासिक बिन्दु पार गरेको छ । सातको दोस्रो कारोकार दिन सोमबार बजार परिसूचक नेप्से ४२.७२ अंकले वृद्धि हुँदा ३०२५.८३ अंकको एतिहासिक उचाइमा पुगेर बन्द भएको छ ।

निषेधाज्ञाले गर्दा आर्थिक गतिविधि ठप्प भएपनि पछिल्लो समय सेयर बजारमा भने एकपछि अर्को नयाँ रेकर्ड बन्दै गएको छ । जेठ ३० गते आइतबार ३८.३३ अंकले वृद्धि भएर २९८३.११ अंकको नयाँ उचाइ कायम गरेको थियो । नेप्सेले आज उक्त रकर्ड तोडेर पहिले पटक ३००० अंक भन्दामाथि पुगेर बन्द भएको हो ।

आइतबार नेप्सेमा १९ अर्ब ५५ करोडभन्दा माथिको कारोबार भएको थियो । जुन नेप्सेमा एक कारोबार दिनमा भएको अहिलेसम्मकै उच्च रकमको कारोबार हो ।

नेप्सेमा आइतबारको तुलनामा कारोबार रकम केही घटेको भएपनि ३ करोड ५० लाख २७ हजार ३६३ कित्ता सेयर किनबेच हुँदा १८ अर्ब ८८ करोड ४० लाख ३२ हजारको कारोबार भएको छ । आज बजारलाई लिड गर्ने बैंकिङ उपसूचकले नेप्सेलाई लिड गर्दा विकास बैंक हाइड्रोपावर, लघुवित्त र अन्य उपसूचक भने घटेको छ ।

आज बजार परिसूचक सँगै ‘क’ वर्गका कम्पनीले मापन गर्ने सेन्सिटिभ इन्डेक्स पनि १०.६० अंकले बढेर ५५०.०१ अंकमा बन्द भएको छ ।

आज नेप्सेमा बैंकिङ उपसूचक २.७२ प्रतिशतले वृद्धि हुँदा होटेल तथा पर्यटन उपसूचक ४.२५ प्रतिशत र लगानी उपसूचक २.३४ प्रतिशतले बढेको छ । यता विकास बैंक उपसूचकमा भने १.११ प्रतिशतले करेक्सन भएको छ ।

आज नेप्सेमा ११ कम्पनीको सेयर मुल्य बढेर सर्किट लेभलमा बन्द भएको छ । सेयर मुल्य बढेर सर्किट लेभलमा बन्द हुनेमा जलविद्युत लगानी तथा विकास कम्पनी, नेपाल इन्स्योरन्स, तारागाउँ रिजेन्स होटेल र सोल्टी होटल बाहेक सबैं कमजोर पफमेन्स भएका कम्पनी रहेका छन् ।

यता माउन्टेन हाइड्रो नेपालको सेयर मुल्य ५.०१ प्रतिशतले घटेको छ ।