डेडिकेटेड र ट्रंक लाइनको बक्यौता उठ्न नसके लाइन काट्नेछौं : शाक्य

नेपाल विद्युत् प्राधिकरणको कार्यकारी निर्देशक हितेन्द्रदेव शाक्यले डेडिकेटेड र ट्रंक लाइनको बक्यौता विवाद समाधानका लागि गठित प्रशासकीय पुनरवलोकन समितिको म्याद ३५ दिनलाई थप गरिएको बताएका छन् । बुधबारको सञ्चालक समितिले म्याद थप गर्ने निर्णय गरेको हो ।

आइतबार सञ्चारकर्मीसँग कुरा गर्दै उनले समितिले निर्णय गरेपछि बक्यौता उठाइने बताए । बक्यौता उठ्न नसके लाइन काटिने शाक्यले प्रष्ट्याए । समितिलाई यसअघि दिइएको ३५ दिनको समय साउन ३ गते सकिएको थियो । तर, तोकिएको समयमा काम नभएपछि म्याद थपिएको हो ।

सञ्चालक समिति सदस्य तथा पुनरावलोकन समितिका अध्यक्ष श्यामकिशोर यादव छन् । डेडिकेटेड र ट्रंक लाइनको बक्यौता २४ अर्बभन्दा बढी छ ।