प्रचण्डको चितवन चर्को भाषण माओवादीका लागि महँगो साबित, युवा नेता श्रेष्ठ सहित जम्बो टोलीले काठमाडौँबाट गरे पार्टी परित्याग !

२३ बैशाख, काठमाडौँ ।

भरतपुर महानगरपालिकामा गठबन्धनको चुनावी सभालाई सम्बोधन गर्दै प्रचण्डले फेरी पनि रेणु दाहालले नजिते देश दुर्घटनामा पर्ने भन्दै दिएको अभिव्यक्ति मंहगो साबित हुने देखिएको छ । नेकपा (माओवादी केन्द्र) का अध्यक्ष समेत रहेका पुष्प कमल दाहाल ‘प्रचण्ड’को यो अभिव्यक्तिको चौतर्फी खण्डन भइरहेको छ । कार्यकर्ता तहमा असन्तुष्ट पक्षको संख्या बढेसंगै पार्टी परित्यागको संख्या ह्वात्तै बढेको छ ।

प्रचण्डको उक्त चितवन चर्को भाषणको २४ घण्टा नबित्दै माओवादी केन्द्र काठमाडौँका युवा नेता अमर श्रेष्ठ सहितको जम्बो टिमले पार्टी परित्यागको घोषणा गरेका छन् । बागमती प्रदेश कमिटीलाई पत्र बुझाउँदै नेता श्रेष्ठ र अर्का नेता जितेन्द्र खड्काले समेत पार्टी परित्यागको घोषणा गरेका हुन् । काठमाडौँ क्षेत्र नम्बर ४ मा श्रेष्ठ राम्रो जनलहर भएका युवा नेताको रूपमा लिइन्छ । उनले गरेको पार्टी परित्यागलाई क्षेत्रीय तहका अन्य राजनीति दलले समेत विशेष अर्थपूर्ण तरिकाबाट हेरेका छन् । श्रेष्ठको सिङ्गो टिमले पनि केही दिनमै सयौँको सङ्ख्यामा पार्टी परित्याग गर्ने बुझिएको छ ।

यसले माओवादी केन्द्रबाट वैशाख ३० गते हुने स्थानीय तहको निर्वाचनका लागि बुढानीलकण्ठ नगरपालिकामा उठेका माओवादी पार्टीका उम्मेदवारहरूलाई नसोचेको धक्का लाग्ने देखिएको छ ।

बुढानीलकण्ठ नगरपालिका वडा नम्बर १३, चुनिखेलका स्थानीयवासी समेत रहेको श्रेष्ठ काठमाडौँ क्षेत्र नम्बर ४ का पूर्व क्षेत्रीय सचिव हुन् । अबको राजनीतिक यात्रा कता हुन्छ भन्ने विषय तय नभएको बताएका छन् ।

पार्टी सदस्य समेत नरहने गरी श्रेष्ठले लेखेको राजीनामा पत्रमा भनेका छन्, ‘वि.स. २०५९ सालदेखि निरन्तर पार्टीको सदस्य मै काम गर्दै आएको र हाल मेरो व्यक्तिगत समय पार्टीलाई दिन नसकेको हुँदा हालसम्म पार्टीले गरेको सहयोग र पार्टीको सदस्य साथीहरूको उच्च मायालाई आत्मसाथ गर्दै आजको मितिदेखि लागु हुने गरी मेरो यस पार्टीको साधारण सदस्य समेत नरहने गरी राजीनामा पेस गरेको छु ।’