महानगर भागबण्डामा सहमति : भरतपुर नेकपा माओवादीलाई !

सत्तारुढ गठबन्धनमा महानगरपालिका भागबण्डामा सहमति जुटेको छ । महानगरमा सहमति जुटे सँगै अब गठबन्धन चुनावमा होमिने पक्का पक्की भएको हो । चितवन काँग्रेसले माओवादीलाई सहयोग नगर्ने बताई रहेका बेला भरतपुर माओवादीलाई दिने केन्द्रको निर्णय आएको छ।

मंगलबार दिउँसो बालुवाटारमा भएको गठबन्धनका शीर्ष नेताको बैठकले ६ मध्ये तीन महानगर कांग्रेसले लिने, माओवादी, एकीकृत समाजवादी र जनता समाजवादी पार्टीले एक/एक महानगरको नेतृत्व लिने सहमति गरेको स्रोतले बताएको छ ।

त्यस अनुसार पोखरा महानगरपालिकाको नेतृत्व एकीकृत समाजवादीले पाउनेछ । त्यस्तै नेकपा माओवादी केन्द्रले भरतपुर महानगरपालिका र जनता समाजवादी पार्टीले वीरगञ्ज महानगरपालिकाको नेतृत्व पाउनेछ ।

नेपाली कांग्रेसले काठमाडौं, ललितपुर र विराटनगर महानगरपालिकाको नेतृत्व लिने सत्तारुढ गठबन्धनको बैठकमा सहभागी एक नेताले जानकारी दिए । सहमतिको खाका मंगलबार साँझसम्म तयार हुने उनले बताए । सम्पूर्ण सहमति सहितको गठबन्धनको खाका बेलुका सार्वजनिक हुने बताइएको छ।