हाम्रो अर्थतन्त्रमा ठूलो संकट आएको छैन: अर्थमन्त्री शर्मा

अर्थमन्त्री जनार्दन शर्माले अर्थतन्त्रलाई नियमित गतिमा चल्न दिनुपर्ने बताएका छन्। उनले अर्थतन्त्रलाई लिएर यसैमा राजनीतिकरण गर्न नहुने बताए।

तथ्यांक र अवस्था हेर्दा नेपालको अर्थतन्त्रमा कुनै ठूलो संकट नआएको उनको भनाइ छ। तथ्यांक र अवस्था हेर्दा हाम्रो अर्थतन्त्रमा कुनै ठूलो संकट आएको छैन,’ अर्थ मन्त्रालयमा आज पत्रकार सम्मेलन गर्दै उनले भने, ‘जसरी यहाँ ठूलो संकट आयो, देशमा के-के न हुन्छ भनिएको छ। त्यस्तो होइन। अर्थतन्त्रलाई नियमित गतिमा चल्न दिनुपर्छ, राजनीतिकरण गर्न हुन्न।

उनले अर्थतन्त्रलाई लिएर राजनीति गर्दा देशलाई फाइदा नपुग्ने बताए। ‘व्यवसायी र जनतालाई हतोत्सायी गर्ने खालका प्रचारबाजी भइरहेको छ, त्यो नगर्न अपिल गर्छु,’ उनले भने, ‘ठूलो संकटमा गयो भनेर प्रचार गरिएको छ त्यो उपयुक्त छैन। हामी सतर्क हुनुपर्ने अवस्था छ, यसतर्फ मन्त्रालयले नीतिगत कदम चालिसकेको छ।’

प्रमुख प्रतिपक्षी नेकपा एमालेले आइतबार पत्रकार सम्मेलन गर्दै अर्थतन्त्र बिग्रदो अवस्थामा रहेको आरोप लगाएको थियो।