एकीकृत समाजवादी जस्तो असली कम्युनिस्ट पार्टी अरू कुनै छैनन् : माधव नेपाल

एकीकृत समाजवादी पार्टीका अध्यक्ष माधव कुमार नेपालले समाजवादी पार्टी असली कम्युनिस्ट पार्टी भएको बताएका छन् । नेपालमा समाजवादी जस्तो असली कम्युनिस्ट पार्टी अरू कुनै नभएको समेत नेपालको दाबी थियो ।

विराटनगर विमानस्थलमा आज सञ्चारकर्मीसँगको कुराकानिको क्रममा उनले सोकुरा बताएका हुन् । उनले आसन्न स्थानीय तहको निर्वाचनमा लोकतन्त्रवादीको गठबन्धन हुने बताए । उनले तत्कालीन सरकारले प्रतिगमन निम्त्याएको र अह्मकारी बनेकाले नै गठबन्धनको आवश्यकता परेको आरोप लगाए ।

‘विनविन’को सिद्धान्तले गठबन्धन हुन्छ भन्दै पूर्वप्रधानमन्त्री नेपालले नेकपा (एकीकृत समाजवादी) नै असली कम्युनिष्ट पार्टी भएकाले मतदाताले कलम चिह्नमा अपार मत हाल्ने विश्वास व्यक्त गरे ।

उनले युक्रेन र रुसको समस्या जटिल भएकाले यसको समाधान बहस र छलफलबाट टुङ्गो लगाउनुपर्ने धारणा राखे । नेता नेपालले समाजवादी पार्टीलाई जनताले समेत विश्वास गरेर कलम चिन्हमा मतदान गर्ने समेत बताए । उनले एमाले अध्यक्ष ओलीलाई लक्षित गर्दै नेपालमा कम्युनिस्टको खोल ओढेकाहरू  सक्कली कम्युनिस्ट भएको बताउँदै हिँडेको तर सही अर्थमा समाजवादी पार्टी मात्रै कम्युनिस्ट सिद्धान्त बोकेर जनताको घरदैलोमा पुग्ने समेत बताए ।