संसद बैठक एमालेले अवरोध जारी राख्ने, एमसीसी अनुमोदन आजै हुने !

नेकपा एमालेले आइतबारको प्रतिनिधिसभा बैठक पनि अवरोध कायमै राख्ने जनाएको छ । सत्ता गठबन्धनले आजै एमसीसीलाई सांसदबाट अनुमोदन गराउने निर्णयमा पुगे पनि आफ्ना माग सम्बोधन नभएको भन्दै संसद् बैठक अवरुद्ध गर्ने एमालेले जनाएको छ ।

एमाले प्रक्रियामा सहभागी नहुने भएपछि सत्तारुढ दललाई एमसीसी अनुमोदन गराउन झन् सहज हुने छ । यसअघि आइतबार विहान सत्ता साझेदार दलले व्याख्यात्मक घोषणासहित एमसीसी अनुमोदन गर्ने निर्णय गरिसकेका छन् ।

एमसीसीलाई व्याख्यात्मक टिप्पणी सहित अनुमोदन गराउन माओवादी र समाजवादी तयार भए पछि आजै सांसदबाट अनुमोदन हुन लागेको हो । यो सँगै सत्ता गठबन्धन नटुट्ने देखिएको छ ।

पाँच दलीय सत्ता गठबन्धनले व्याख्यात्मक घोषणासहित आजै अमेरिकी सहयोग सम्बन्धी सम्झौता एमसीसी पारित गर्ने निर्णय गरेको हो ।

प्रधानमन्त्री निवास बालुवाटारमा आज बिहान बसेको सत्ता गठबन्धनको बैठकले व्याख्यात्मक घोषणासहित एमसीसी सांसदबाट अनुमोदन गर्ने निर्णय गरेको नेपाली काँग्रेसका वरिष्ठ नेता रामचन्द्र पौडेलले बताएका थिए ।

एमालेले संसदीय दलका उपनेता सुवास नेम्वाङका अनुसार प्रतिनिधिसभाको अवरोध खोल्न एमाले तयार छैन ।  एमालेले राखेका  मागमा सरकार सकारात्मक देखिएन हामी प्रक्रियामा सहभागी हुने अवसरबाट वञ्चित हुनेछौ । संसद्को अवरोध जारी रहन्छ ।