हामी बालुवाटारमा एउटा र खुमलटारमा अर्को कुरा गर्दैनौँ : गगनको प्रचण्डप्रति कटाक्ष

नेपाली काँग्रेस महामन्त्री गगन थापाले एमसीसी पास गर्ने कुरामा अडिग रहेको बताएका छन्। विहीबार प्रधानमन्त्री निवास बालुवाटारमा काँग्रेस नेता अर्जुननरसिंह केसीको पुस्तक विमोचन कार्यक्रममा उनले प्रतिपक्षमा हुँदा एउटा र सरकारमा हुँदा अर्को कुरा गर्ने पार्टी नभएको बताए ।

महामन्त्री थापाले  भने, ‘काँग्रेस आफूलाई एमसीसी पास गर्ने कुराका अडिग छ । सत्तामा हुँदा एउटा र प्रतिपक्षीमा हुँदा अर्को कुरा गर्दैन ।’

थापाले आफूलाई ठीक लागेको विषयमा काँग्रेस सँधै एउटै अडानमा रहने बताए । उनले माओवादी केन्द्रका अध्यक्ष पुष्पकमल दाहाल प्रचण्डप्रति कटाक्ष गरे ।

महामन्त्री थापाले भने, ‘बालुवाटारमा एउटा कुरा र खुमलटारमा अर्को कुरा गर्ने पार्टी होइन काँग्रेस । काँग्रेस सबै कुराको हेक्का राखेर आफ्नो अडानमा उभिन्छ ।’

केही समय अघि एमसीसी पास गर्ने सर्तमा माओवादी अध्यक्ष प्रचण्डले हस्ताक्षर गरेको पत्र बाहिरिएको थियो । अहिले माओवादी संसदीय दलले एमसीसी जस्ताको तस्तै पास नगर्ने बरु सरकारबाट बाहिरिने निर्णय गरिसको अवस्थालाई लक्षित गर्दै गगनले कटाक्ष गरेका हुन् ।