पृथ्वी जयन्ती : किन गरेन सरकारले वास्ता ?

राष्ट्र निर्माता पृथ्वीनारायण शाहको जन्म जयन्तीलाई सरकारले बेवास्ता गरेजस्तो देखिएको छ । विभिन्न छरिएर रहेका राज्यलाई एउटै राज्य नेपाल बनाउन महत्त्वपूर्ण भूमिका निर्वाह गरेका पृथ्वीनारायण शाहको मुलुक निर्माण गर्नुमा महत्त्वपूर्ण भूमिका छ ।

सरकारले बेवास्ता गरेपनि राष्ट्रपति विद्यादेवी भण्डारीले भने पृथ्वीनारायण शाहको तस्वीरमा माल्यार्पण गरेकी छन् । सिंहदरवारको मुल गेट अगाडि रहेको पृथ्वीनारायण शाहको शालिकमा उनले पुष्पहार चढाएकी हुन् ।

पृथ्वी जयन्तीका अवसरमा सार्वजनिक बिदा दिन तथा राष्ट्रिय एकता दिवसका रुपमा मनाउन माग हुँदै आए पनि सरकारले भने ती मागलाई वास्ता गरेन । सरकारी स्तरबाट पृथ्वी जयन्तीका अवसरमा कुनै कार्यक्रम नगरिए पनि राष्ट्रपति भण्डारी पृथ्वीनारायण शाहको शालिकमा माल्यार्पण गर्न पुगेकी हुन् ।

पृथ्वीनारायण शाहको शालिकमा माल्यार्पण गर्नका लागि सर्वसाधारणसमेत पुगेका छन् । पूर्वराजा ज्ञानेन्द्र शाह पनि आजै सोही स्थानमा पुगेर माल्यार्पण गर्ने कार्यक्रम छ ।

यसरी राष्ट्र निर्माणमा अतुलनीय भूमिका खेलेका पृथ्वीनारायण शाहको जन्म जयन्तीलाई सरकारको तर्फबाट बेवास्ता गर्नुलाई जनताले गुनासो पोखेका छन् ।