भक्तपुरमा मास्क अनिवार्य, नलगाए कारबाही !

कोरोना संक्रमण बढ्दै जाँदा जिल्ला प्रशासन कार्यालय भक्तपुरले मास्क अनिवार्य गरेको छ ।

संक्रमणदर रोक्न आजदेखि कडाइका साथ मास्क अनिवार्य गरिएको भक्तपुरकी प्रमुख जिल्ला अधिकारी रुद्रादेवी शर्माले बताइन् । प्रजिअ शर्माले मास्क अनिवार्य गरिएको र मास्क नलगाएको पाइए कारवाही गरिने जानकारी दिइन् ।

‘‘संक्रमणदर बढ्दै जाने उच्च जोखिम छ । कोरोना खोप प्रभावकारी रुपमा अगाडि बढाउँन र मास्कको अधिकतम प्रयोग गराउन सक्रिय छौँ,” उनले भनिन् ।

पछिल्ला दिनमा कोरोनाको नयाँ भेरिअन्ट सक्रिय भए सँगै कोरोना सङ्क्रमणको जोखिम बढे सँगै भक्तपुर जिल्लामा मास्क अनिवार्य गरिएको हो । स्वास्थ्य मापदण्ड कडाइका साथ पालना गर्ने निर्देशन भक्तपुर जिल्लामा मात्र हैन देशैभर स्वास्थ्य मन्त्रालयले दिएको छ ।

भारतमा दैनिक कोरोना सङ्क्रमण फैलिए सँगै नेपालमा पनि खुला सिमानाका कारण संक्रमण दर फैलिँदै गएको पाइएको छ ।