प्रचण्डको दस्तावेजमा भारतीय विस्तारवाद, हिन्दु अतिवादले नेपालमा पारेको असर उल्लेख गर्न माग

माओवादी केन्द्रका अध्यक्ष पुष्पकमल दाहाल ‘प्रचण्ड’ले पार्टीको जारी आठौं राष्ट्रिय महाधिवेशनमा पेस गरेको राजनीतिक प्रतिवेदनमा भारतीय विस्तारवाद र हिन्दु अतिवादले नेपालमा पारेको असर उल्लेख गर्न माग गरिएको छ ।

सम्पर्क समन्वय विशेष प्रदेश कमिटीका तर्फबाट प्रचण्डको प्रतिवेदनमाथि समूहगत छलफलको निष्कर्ष बन्दसत्रमा प्रस्तुत गर्दै श्रीकृष्ण अधिकारीले यस्तो माग गरेका हुन् ।

उनले अध्यक्षको राजनीतिक प्रतिवेदनले यथास्थितिको निरन्तरतामा क्रमभङ्ग गरेको पनि चर्चा गरे । प्रतिवेदनले बुर्जुवा व्यवस्थाविरुद्ध प्रहार गरेको उनको भनाइ थियो ।

उनले अन्तर्राष्ट्रिय कम्युनिस्ट मञ्च निर्माणमा पार्टीले नेतृत्वदायी भूमिका निर्वाह गर्नुपर्ने सुझावसमेत आएको बताए । प्रतिवेदनमा त्रिदेशीय रणनीतिक साझेदारीबारे विश्लेषण आवश्यक रहेको पनि उनले औंल्याए ।

असमान सन्धि पुनरावलोकन गर्ने तथा कालापानी, लिम्पियाधुरा र लिपुलेकसहितको नक्सा प्रकाशनको स्वामित्व पार्टीले लिनुपर्ने सुझाव पनि आफ्नो समूहबाट आएको उनले बन्दसत्रलाई जानकारी गराए ।

उनले राजनीतिक दलहरूलाई हेर्ने दृष्टिकोण पनि प्रस्ट पार्न आवश्यक रहेको बताए ।