मैले प्रचण्डलाई हात र साथ दिए, तर प्रचण्डले कुरा बुझेनन् अहिले ओरालो यात्रामा छन् : ओली

नेकपा एमाले अध्यक्ष केपी शर्मा ओलीले आफूले साथ दिएकै कारण माओवादी केन्द्र यो स्थानमा आइपुगेको बताएका छन्। पर्सामा कार्यकर्तालाई पार्टीमा प्रवेश गराउँदै ओलीले यस्तो बताएका हुन्। प्रचण्डलाई आफूले साथ र हात दिएर यो अवस्थामा भएको जिकिर गरेका ओलीले अब प्रचण्डको ओरालो यात्रा तय भएको समेत सङ्केत गरेका थिए ।

प्रचण्ड र माधव नेपाल उपर खनिँदै आएका एमाले अध्यक्ष ओली अहिलेका भाषणमा प्रचण्ड र माधव नेपाललाई गाली गर्दै आएका छन् । नेकपा फुटाउने प्रमुख भूमिकामा माओवादी केन्द्रका अध्यक्ष प्रचण्ड र माधव नेपालको अहम् भूमिका रहेको ओलीको बुझाई रहँदै आएको छ ।

उनले आज पनि प्रचण्डले कुरा नबुझेकै कारण ओरालो यात्रा गर्न सुरु गरेको तर्फ सङ्केत गरेका थिए । सम्बोधनको क्रममा उनले भने आफूले साथ दिँदा प्रचण्डले कुरा बुझेनन् । ओलीले तत्कालीन अवस्थामा आफू सरकारमा रहँदा विकासको लहर ल्याएको भन्दै वर्तमान सरकार जनताले चाहेको सरकार नभएको बताए।

ओलीले अहिलेको गठबन्धन सरकार जनताको हितमा नरहेको जिकिर गरे । उनले भने अहिलेको सरकार जनताको हितमा छैन । यो सरकार स्वार्थ उन्मुख रहेको भन्दै जनताको हितमा यो गठबन्धन नरहेको समेत बताएका छन् ।

पछिल्लो समय एमाले अध्यक्ष ओली माओवादी अध्यक्ष प्रचण्ड र समाजवादी अध्यक्ष माधव नेपाल एउटै मञ्चमा समेत बस्न नमानेको आभास नेपाली जनतामा भएको छ । केही दिन अगाडि काँग्रेसको महाधिवेशन उद्घाटन सत्रमा एउटै मञ्चमा देखिएका त्रय नेता एक अर्कामा भाषणको क्रममै घोचपेचमा उत्रेका थिए ।

नेकपा फुट संगै माओवादी केन्द्र र एमाले आफ्नै बाटो लागे । ओली सरकार ढलेर मुलुकमा देउवा प्रधान मन्त्री भए । बिचमा माधव नेपाल समेत एमालेबाट अलग भएर समाजवादी दल घोषणा गरे सँगै एमाले अध्यक्ष ओली प्रचण्ड र माधव नेपाल सँग रुष्ट रहेका छन् । हरेक भाषणमा एमाले अध्यक्ष ओली प्रचण्ड र माधव नेपाल प्रति कटाक्ष गरेको पाइन्छ ।