कमल थापालाई राप्रपा अध्यक्षमा पछार्ने राजेन्द्र लिङ्देन को हुन् ?

राप्रपा भनेकै कमल थापाको पार्टी हो भन्ने परिचय लगभग स्थापित गराउन सफल लामो समय राप्रपाको अध्यक्ष समालेका कमल थापालाई आसन्न राप्रपाको एकता अधिवेशनमा हराएर राजेन्द्र लिङ्देन चर्चाको शिखर मा पुगेका छन् ।

५६ वर्षीय लिङ्देन पार्टीको अधिवेशनबाट अध्यक्षमा निर्वाचित बनेका हुन । राजा सहितको हिन्दु राज्यको वकालत गर्ने पार्टी राप्रको अध्यक्ष बने पछि लिङ्देन चर्चाको विषय बनेका छन् ।

झापाको हल्दिबारी गाउँपालिका–१ घर भएका लिङ्देन २०७४ सालको प्रतिनिधिसभा निर्वाचनमा नेपाली कांग्रेसका प्रभावशाली नेता कृष्णप्रसाद सिटौलालाई हराएर चर्चित बनेका थिए ।

लिङ्देनको जन्म भने वि.सं. २०२२ साल भदौ २२ गते पाँचथरको अमरपुरमा भएको थियो । उनको राजनीतिक यात्रा २०३६ सालबाट सुरु भएको थियो । २०३६ सालमा राष्ट्रवादी स्वतन्त्र विद्यार्थी मण्डलमा उनी आवद्ध भएका थिए । २०४७ सालमा राप्रपाको झापा जिल्ला सचिव बने । २०४९ सालमा राप्रपाको विद्यार्थी संगठन (राष्ट्रिय प्रजातान्त्रिक विद्यार्थी संगठन) बन्दा उनी संस्थापक अध्यक्ष बने । २०४७ पछि स्थापित राप्रपाको जिल्ला तहको पदाधिकारीदेखि २०६६ सालमा पार्टी केन्द्रीय सदस्य र त्यसपछि महामन्त्रीको रुपमा उनी कार्यरत रहे ।

पिता मानप्रसाद र माता धनकुमारीका छोरा लिङ्देनले राजनीतिशास्त्र र इतिहासमा स्नातकसम्म अध्ययन गरेका छन् ।

०७० सालको दोस्रो संविधानसभाको निर्वाचनमा पराजय व्यहोरेका लिङ्देन २०७४ सालको प्रतिनिधिसभा निर्वाचनमा कांग्रेसका प्रभावशाली नेता कृष्णप्रसाद सिटौलालाई हराएपछि चर्चामा रहे । लिङ्देन झापा क्षेत्र नम्बर–३ बाट सांसद् निर्वाचित भएका हुन् ।