सत्ता गठबन्धनको बैठकमा प्रधानन्यायाधीशको कुरै उठेन,राष्ट्रिय सभामा मिलेर जाने मात्र कुरा भयो

सत्ता गठबन्धन दलको बैठकमा प्रधानन्यायाधीश चोलेन्द्रशम्शेर जबराको राजीनामा माग गर्दै भइरहेको आन्दोलनको विषयले बैठकमा प्रवेश नै नपाएको स्रोतको दाबी छ । दलका नेताहरू प्रधानन्यायाधीश प्रकरणमा मौन रहेको आरोप लागि रहेको बेलामा केही निर्णय आउँछ भन्ने आस गरिएको थियो तर सत्ता गठबन्धनले चोलेन्द्र प्रकरणमा केही बोलेन ।

सर्वोच्च अदालतका न्यायाधीशहरुले प्रधानन्यायाधीशको राजीनामा माग गर्दै बन्दी प्रत्यक्षीकरण बाहेकका मुद्दा हेरेका छैनन् भने नेपाल बार एसोसिएसनले जबराको राजीनामा माग गर्दै चरणबद्ध आन्दोलन गरिरहेको छ ।

दलहरूको मौनताबारे प्रश्न उठेपछि सत्तारुढ दलका नेताहरूले गठबन्धनको आगामी बैठकमा छलफल गर्ने बताएका थिए । तर सोमबार प्रधानमन्त्री निवास बालुवाटारमा बसेको सत्तारुढ पाँच दलको बैठकमा यो विषयले प्रवेश नै पाएन ।

बैठकले सरकार सञ्चालनमा सहयोग गर्न ११ सदस्यीय समन्वय समिति बनाएको छ । साथै आसन्न राष्ट्रियसभा चुनावमा मिलेर जाने सहमति भएको एक नेताले बताए ।

राष्ट्रियसभाका २० सदस्यको कार्यकाल फागुनमा सकिँदै छ, उनीहरूमध्ये १९ जना निर्वाचनमार्फत चयन हुनेछन् । उक्त चुनावको मिति भने तय हुन बाँकी छ ।