विप्लव समूहको निर्णय : शासन व्यवस्थाबारे जनमतसंग्रहमा जानै पर्छ

नेत्रविक्रम चन्द विप्लव समूहको केन्द्रीय समिति बैठकले अहिलेको शासन प्रणाली असफल भएको दाबी गर्दै जनमत सङ्ग्रहमा जानु पर्ने निर्णय गरेको छ ।

विप्लव समूहले सबै देशभक्त, प्रगतिशील र कम्युनिस्ट शक्तिहरूलाई मोर्चाबद्ध तथा एकताबद्ध गर्दै जनमतसंग्रहका लागि अभियान सञ्चालन गर्ने निर्णय समेत गरेको छ । उसले अमेरिकी सहयोग परियोजना एमसीसी विरोधी सबै शक्तिहरूसँग सहकार्य गर्ने जनाएको छ ।

देशव्यापी संगठन विस्तार गर्ने र राष्ट्रियता, जनजीविका, भ्रष्टाचार लगायतका मुद्दामा संघर्ष गर्ने निर्णय पनि विप्लव समूहको केन्द्रीय समितिले गरेको छ ।

तनहुँको बन्दीपुरमा बसेको सो समूहको केन्द्रीय समितिको ११ औं बैठकले जनयुद्ध दिवसको अवसर पारेर आगामी फागुनमा नवौं महाधिवेशन गर्ने निर्णय समेत गरेको हो ।