ओलीले केन्द्र सत्ता जोगाउन नसक्दा सातै प्रदेशमा ओली नेतृत्वको एमाले पत्ता साफ !

केन्द्रमा नेकपा एमालेका अध्यक्ष केपी शर्मा ओलीले आफ्नो नेतृत्व रहेको सरकार आफ्नै जिद्दी स्वभावका कारण जोगाउन नसक्दा सातै प्रदेशमा एमाले नेतृत्वको सरकार पत्ता साफ हुने निश्चित प्राय भएको छ ।

केन्द्रबाट सत्ता बाहिर भएको नेकपा एमाले अब प्रदेशमा पनि एकपछि अर्को हुँदै नेतृत्व बाट बाहिर हुने भएको छ । पहिले केन्द्र र चार वटा प्रदेशमा एमालेको नेतृत्व रहेका थियो ।

केन्द्रमा ओलीले सत्ता बचाउँन नसकेपछि गडण्की प्रदेशमा पृथ्वीसुब्बा गुरुङ, लुम्बिनीमा शंकर पोखरेलको मुख्यमन्त्री पद गुमी सकेको छ ।

अब बाकि रहेको प्रदेश १ र बागमती प्रदेशमा एमालेका भीम आचार्य र अष्टलक्ष्मी शाक्य मुख्यमन्त्री छन, तर दुबै जना अल्पमतमा छन र मुख्यमन्त्रीबाट राजिनामा दिनुको कुनै विकल्प छैन । यो संगै केन्द्र र सबै प्रदेश एमाले नेतृत्व  बिहिन हुने निश्चित प्राय भईसकेको छ ।

बागमती प्रदेशमा ओलीले रातारात अष्टलक्ष्मी शाक्यलाई मुख्यमन्त्री बनाएर पार्टी फुट्नबाट जोगाउने प्रयास गरेका थिए तर माधव नेपालको पार्टीमा १२ जना सांसद गएपछि शाक्य अल्पमतमा छन् ।

त्यस्तै प्रदेश नम्बर १ मा पनि भीम आचार्यलाई मुख्यमन्त्री बनाएको एक हप्ता नबित्दै १० जना सांसद समाजवादीमा गएपछि भीम आचार्यको सरकार अल्पमतमा परेको छ । समग्रमा केन्द्रबाट सत्ता बाहिरिएको एमाले सातै प्रदेशबाट बाहिरिने निश्चित भएको छ ।