नारदमुनिमाथिको हर्कतले माधव नेपाललाई निकै महँगो पर्ने संकेत, केही घण्टा नबित्दै नारदमुनिले चाले यस्तो कदम

काठमाडौं । संसदीय समितिको बैठकमा आज भएको घटनालाई लिएर एमाले सांसद नारदमुनि रानाले कडा प्रतिवाद गर्ने संकेत दिएका छन् ।

रानाले आफूमाथि अभद्र व्यवहार भएको भन्दैँ संसद सचिवालयसँग अडियो रेकर्डिङ माग गरेका छन् । रानालाई एमालेकै वरिष्ठ नेता माधवकुमार नेपालले बैठकमा थर्काउँदै राजीनामा दिएर निस्किन आदेश दिएका थिए ।

अन्तर्राष्ट्रिय सम्वन्ध समितिको बैठकमा निम्त्याइएका कैलाली ५ का सांसद रानासँग वरिष्ठ नेता नेपालको राजनीतिक विवाद भएको थियो ।

संसद सचिवालयका महासचिवलाई पत्र लेख्दै रानाले बैठकको श्रव्यदृष्य आवश्यक परेको हुँदा उपलब्ध गराउन आग्रह गरेका हुन् ।

सांसद रानाले माधव नेपालले आफूमाथि अभद्र व्यवहार गरेको बताए । संसदीय समिति बैठकको सबै रेकर्ड सुनेर कारवाही होस् भनि आफूले अडियो मगाएको उनको भनाइ छ ।

रानाले भने, ‘माधव नेपाल को हुन् मलाई बैठकबाट बाहिर जा भन्ने ? संसदीय समितिमा माधव नेपाल र म बराबर हैसियतमा छौं ।’

राजनीतिक विवाद माधव नेपालले नै सुरु गरेको उल्लेख गर्दै रानाले थपे, ‘परमादेशबाट नियुक्त भएका प्रधानमन्त्रीलाई मैले जनादेशबाट भनिरहनुपर्ने हो ?’

यसैबीच, पूर्व मन्त्री तथा नेकपा एमालेका सांसद नारद मुनि रानाले प्रतिनिधि सभाको अन्तर्राष्ट्रिय सम्बन्ध तथा श्रम समिति माधव नेपालको खल्तीको समिति हो भन्दै प्रश्न गरेका छन्।

आइतबार संसदीय समितिमा सांसद राना र एमालेकै वरिष्ठ नेता माधव नेपालबीच भनाभन भएपछि एक मिडियासँग उनले मलाई  समितिबाट बाहिर जा भन्ने के अन्तर्राष्ट्रिय समिति माधव नेपालको खल्तीको समिति हो ? भन्दै प्रश्न गरेका हुन्।