कोरोना कहरमा नेपाल लोकतान्त्रिक खेलकुद संघको ‘सहयोग अभियान’ कार्यक्रम

काठमाडौँ–नेपाली कांग्रेसको भातृ सङ्गठन नेपाल लोकतान्त्रिक खेलकुद संघ बागमती प्रदेशले कोरोना कहरमा विपन्न, मजदु तथा खेलाडीहरुलाई सहयोग गर्ने उद्देश्यले ‘सहयोग अभियान’ कार्यक्रम सञ्चालन गरिरहेको छ ।

निषेधाज्ञा बढ्दै जाँदा झन् कठिन समय बिताइरहेका समस्या ग्रस्त व्यक्तिहरूको समस्यालाई केही सम्बोधन गर्ने उद्देश्यले सहयोग अभियान सुरु गरिएको बताइएको छ ।

यस अन्तर्गत नेपाल लोकतान्त्रिक खेलकुद संघ बागमती प्रदेशले काठमाडौँको बुढानीलकण्ठ नगरपालिकामा क्यान्सर पीडित ८ वर्षीय बालकलाई एक महिनाको औषधी उपचार सहित सोही अवधिका लागि खाद्यान्न उपलब्ध गराएको छ । यस्तै बुढानीलकण्ठ नगरपालिका वडा नम्बर १२ का २९ वर्षीय युवकको कोभिडको कारण मृत्यु भएको र मृतकको परिवारलाई १ महिनाको खाद्यन्नहरु समेत उपलब्ध गराएको छ ।

सहयोग अभियान अन्तर्गत काठमाडौँका विभिन्न स्थानमा रहेका ट्राफिक तथा प्रहरी कार्यालयहरूमा मास्क, सेनिटाइजर, फेश शिल्ड, ग्लोब लगायतका स्वास्थ्य समाग्रीहरु समेत वितरण गरेको छ । संघले यस अभियान निरन्तर जारी रहने र समस्यामा परेका खेलाडी तथा खेलकर्मीहरूलाई प्राथमिकतामा राखेर सहयोग गरिने अध्यक्ष दीपक गुरुङले बताए ।