डाक्टर र स्वास्थ्यकर्मीमाथि हातपात गर्नेलाई कडा कारबाही गर्न नेपाल चिकित्सक संघको माग

नेपाल चिकित्सक संघले डाक्टर र स्वास्थ्यकर्मीमाथि हातपात गर्नेलाई कडा कारबाहीको माग गरेको छ ।

संघले एक विज्ञप्ति जारी गर्दै यो महामारीको विषम अवस्थामा ज्यानको बाजी थापेर सेवामा खटिएका स्वास्थ्यकर्मीमाथि भएको आक्रमण निन्दनीय रहेको जनाएको छ ।

कुटपिट र आक्रमणका घटना दिनहुँ बढेको भन्दै महासंघले दोषीलाई कानूनी दायरामा ल्याइ स्वास्थ्यकर्मीको जीवन रक्षाको पहल गरिदिन सरकारसँग माग गरिएको छ।

यसैबीच स्वास्थ्यकर्मीमाथिको कुटपिट र दुर्व्यवहारको विरोध गर्दै भेरी अस्पताल नेपालगञ्जका डाक्टर र स्वास्थ्यकर्मी आन्दोलनमा उत्रिएका छन् । भेरी अस्पताल परिसरमा बिहानैदेखि स्वास्थ्यकर्मीले नाराजुलुस गरिरहेका छन् ।

उनीहरुले डाक्टर र स्वास्थ्यकर्मीमाथि हातपात गर्नेलाई कारबाहीको माग गरेका छन् । गएराति ८ बजेतिर बिरामीको उपचारका क्रममा ज्यान गएपछि मृतकका परिवार र आफन्तले स्वास्थ्यकर्मीमाथि हातपात गरेका थिए । स्वास्थ्यकर्मीले झ्यालबाट हाम फालेर ज्यान जोगाएका अस्पतालका मेसु डाक्टर प्रकाश थापाले जानकारी दिए ।