रियल छोड्ने जिदानको निर्णय

स्पेनिस फुटबल क्लब रियल मड्रिडका प्रशिक्षक जिनेदिन जिदानले क्लब छोड्ने निर्णय गरेका छन् । सिजनको अन्त्यसँगै जिदानले क्लब छोड्ने निर्णय गरेको गोल डटकमले लेखेको छ ।

फ्रान्सेली कोच जिदानले आफ्ना खेलाडीलाई २०२०–२१ को सिजन सकिएसँगै रियल छोड्ने कुरा बताएका थिए । उनले त्यसअघि पनि चेल्सीसँग पराजित हुँदै च्याम्पियन्स लिगबाट बाहिरिँदा पनि टोलीसँग क्लब छोड्ने विषय उल्लेख गरेको बताइएको छ । उनी विशेषगरी च्याम्पियन्स लिगको विषयलाई लिएर चिन्तित रहेको पनि बताइएको छ ।

उनले रियलबाट दोस्रो पटक राजीनामा दिन लागेको खबरमा जनाइएको छ । यसअघि लगातार तीन सिजन च्याम्पियन्स लिगको उपाधि जिताएका उनले २०१८ मा राजीनामा दिएका थिए ।

अब, रियलले आज राति ला लिगामा एथ्लेटिक बिल्बाओको सामना गर्दै छ भने २३ मेमा भिल्लारियलसँग खेल्दै छ । यो खेल जिदानका लागि अन्तिम हुन सक्ने देखिएको छ ।