ओलीको कम्युनिष्ट एकता मात्रै प्रधानमन्त्री पद प्राप्त गर्नका लागी रहेछ : बर्षमान पुन

माओवादी केन्द्रका नेता वर्षमान पुन ‘अनन्त’ले केपी ओलीले समाजवादका लागि, कम्युनिष्ट आन्दोलन बलियो बनाउनका लागि नभई प्रधानमन्त्री पदमा पुग्ने स्वार्थले एकता गर्नुभएको रहेछ भन्ने घटनाक्रमहरूले पुष्टि गरेको बताएका छन ।

ओखलढुंगामा शनिबार पार्टी कार्यकर्ता प्रशिक्षण कार्यक्रममा नेता पुनले सबै धारा र प्रवृत्तिका कम्युनिष्ट शक्तिलाई एकताबद्ध गरिने बताए।

आफूहरूले समाजवाद कार्यान्वयन गर्ने सही नियतका साथ एमालेसँग एकता गरेको भए पनि केपी ओलीले स्वार्थको रणनीतिका रूपमा प्रयोग गरेकाले एकता दीगो नभएको पुनको भनाइ थियो।

उनले अब एकता गर्दा विचार र प्रवृत्तिगत रूपमा माओवादी पार्टी र आन्दोलन हाबी हुने गरी गरिने स्पष्ट पारे।

उनले माओवादीले सबै धारका कम्युनिष्ट पार्टीहरूलाई एकताबद्ध गर्न एकताको झण्डा उठाउने दाबी समेत गरे।

‘एकता हिजो पनि जरूरी थियो, आज पनि जरूरी र आवश्यक छ, फेरि पनि एकताको बाटोबाट अगाडि जानुपर्छ’, उनले भने,’माओवादी केन्द्रले फेरि ध्रुवीकरणको प्रयास गर्छ, एकताको प्रयास गर्छ। हामी एकताको झण्डा उठाउँछौं।’