रामचन्द्र पौडेल समूहको सत्ता मोह, देउवालाई भने, सरकार गठनको पहल गर्नुस् सहयोग गर्छौं

नेपाली कांग्रेसको रामचन्द्र पौडेल समूहले सत्ताको मोह झल्किने गरी, पार्टी सभापति, देउवालाई सरकार गठनको पहल गर्न अनुरोध गरेको छ ।

सरकार गठनमा निर्णायक बनेको जनता समाजवादी पार्टी (जसपा) का नेताहरुसँग भेट्नुअघि सभापति देउवाले दिउँसो ३ बजे पदाधिकारी बैठक बोलाएका छन् ।

त्यसअघि पौडेल समूहका नेताहरु महामन्त्री शशांक कोइरालाको निवासमा भेला भएका थिए । भेलामा सहभागी एक नेता भन्छन्, ‘पदाधिकारी बैठकमा सभापतिजीलाई आफ्नो नेतृत्वमा सरकार बनाउन पहल गर्नुस्, हाम्रो सहयोग रहन्छ भन्छौं ।

कांग्रेस आफैंले भने आफ्नो नेतृत्वमा सरकार गठनको अग्रसरता देखाएको छैन । नेताहरुकाअनुसार यो विषय जसपा नेताहरुसँग शुक्रबार हुने छलफलमा धेरै भर पर्छ ।