प्रचण्डको चेतावनी– नेपालमा ‘ग्रीन रिभोलुसन’ हुन्छ, विचार गर्नुस्

नेपाल कम्युनिस्ट पार्टी (नेकपा)का अध्यक्ष पुष्पकमल दाहाल ‘प्रचण्ड’ले नेपालमा ‘ग्रीन रिभोलुसन’ हुने चेतावनी दिएका छन् ।

प्रतिनिधिसभा विघटनविरुद्ध नेकपाद्वारा बुधबार काठमाडौंमा आयोजित विरोधसभामा अध्यक्ष प्रचण्डले संविधान, कानुन र जनमत सबै कुरा लत्याए त्यसले ग्रीन रिभोलुसन निम्त्याउने चेतावनी दिएका हुन् ।

उनले नेपालको संविधानले प्रतिनिधिसभा विघटनको बाटो बन्द गरेको भन्दै संविधान मिचेर आफैँ ठूला कुरा गरेर हिँड्दैमा त्यसले वैधानिकता नपाउने बताए ।

उनले एउटा सानो समूह लिएर हिँड्दा देशमा त्यत्रो ठूलो विद्रोह भएको बताए । लाखौँको समर्थनलाई हेर्न भन्दै उनले चेतावनीको भाषा प्रयोग गरे । तपाईंहरु के भन्नुहुन्छ ? संविधानअनुसार पनि देश नचल्ने हो भने के हुन्छ ? आफ्नै अगाडिको भेलातर्फ प्रश्न गर्दै उनले भने, यो विशाल जनसमुदाय चुप लागेर बस्छ, हामी चुप लागेर बस्छौँ ? हाम्रो आन्दोलन रोकिँदैन । विचार गर्नुहोला । उनले त्यस्तो अवस्थामा शान्तिपूर्ण विद्रोह हुने बताए ।