उपराष्ट्रपति यादवलाई डेंगु संक्रमण

काठमाडौं । उपराष्ट्रपति रामसहाय प्रसाद यादवलाई डेंगु संक्रमण पुष्टि भएको छ । उनी बानेश्वरस्थित सिभिल अस्पतालमा भर्ना भएका छन् । उनका निजी चिकित्सक शिवजी सिलवालका अनुसार अहिले भने स्वास्थ्यमा तुलनात्मक सुधार भएको छ ।

उपराष्ट्रपति यादव सोमबारदेखि नै अस्वस्थ थिए । निवासमै उपचार गरिरहे पनि ठीक नभएपछि बुधबार साँझ सिभिल अस्पतालमा भर्ना गरिएको थियो ।

उपराष्ट्रपति यादवलाई सुरुमा बान्ता हुने र टाउको दुख्ने लक्षण देखिएको थियो । त्यतिबेला उनले मिठाइ खाएकाले फुड प्वाइजन भएको हो कि भनेर शंका गरेर परीक्षण गरिएको थियो । तर पछि एक सय डिग्रीभन्दा बढी ज्वरो आइरहने, टाउको दुखिरहने, छाति दुख्ने र बान्ता पनि बेला–बेला भइरहने भएपछि बुधबार साँझ सिभिल अस्पताल भर्ना गरिएको थियो ।