नेपाल एयरलाइन्सका कर्मचारीले ब्याग फुटाएपछि सचिवको आक्रोश, मैले मेरो सामान बोक्न अब डोको खोज्नु पर्‍यो ?

काठमाडौं- सरकारी लगानी रहेको नेपाल एयरलाइन्समा यात्रा गर्दा ब्याग (लगेज) चोरी हुने, हराउने र फुटाउने घटना बेलाबेला आउने गरेका छन्। सोमबार भने नेपाल एयरलाइन्सका कर्मचारीले निर्वाचन आयोगका सचिव गोकर्णमणि दवाडीको लगेज फुटाएको पाइएको छ। काठमाडौं-दिल्ली यात्राका क्रममा सचिव दवाडीको लगेज फुटाएको अवस्थामा फेला परेको हो। दिल्ली पुगेर हेर्दा आफ्नो लगेज फुटाएको अवस्थामा भेटिएको सचिव दवाडीले सामाजिक सञ्जालमा लेखेका छन्।

‘नेपाल एयरलाइन्सबाट दिल्ली पुगेपछिको पहिलो उपहार लथालिङ्ग पारिएको फुटाइएको ब्यागेज हात पर्‍यो,’ उनले ट्विटरमा लेखेका छन्, ‘यसको जिम्मा कसले लिने? तिम्रो अनुसन्धान गर्दै गरौला। मैले मेरो सामान बोक्न अब डोको खोज्नु पर्‍यो।’

यस्ता गतिविधिको अनुसन्धान गर्न र दोषीमाथि कारबाही गर्न भन्दै उनले नेपाल एयरलाइन्स र कष्टमर केयरलाई आग्रह गरेका छन्। नेपाल एयरलाइन्स लगायतमा यात्रामा क्रममा यात्रुहरुको लगेज अनधिकृत रुपमा फुटाउने, खानतलासी गर्ने र हराउने गुनासो धेरै आउने गरेको छ।