जित होस् त लिभरपुलको जस्तो, विपक्षी खेलाडीबाटै मिल्यो दुई गोल उपहार !

एजेन्सी । इंग्लिस प्रिमियर लिग (ईपीएल) अन्तर्गत गए राति भएको खेलमा लिभरपुल भाग्मानी सावित भएको छ । विपक्षी खेलाडी बाटै दुई गोल उपहार पाएसंगै जित निकालेको छ ।
ओउट फेइसले दुई आत्मघाती गोल उपहार दिएपछि लिभरपुलले इंग्लिस प्रिमियर लिगमा लेस्टर सिटीलाई पराजित गरेको हो ।

एनफिल्डमा भएको खेलमा लिभरपुलले घरेलु मैदानमा लेस्टर सिटीलाई २–१ ले पराजित गरेको हो । लेस्टरका किअरनान डिउसबुरी हलले गोल गर्दा लिभरपुलले दुवै गोल उपहार पाएको थियो ।

शुक्रबार राति भएको खेलको चौथो मिनेटमा नै का किअरनान डिउसबुरी हलको गोलबाट घरेलु टोली लिभरपुल खेलमा पछि परेको थियो । उनले पास्टन डाकाको पासमा गोल गरेका हुन् ।

उनै पास्टन डाका १५औं मिनेटमा चोट बोक्दै मैदानबाट बाहिरिनु परेको थियो । त्यसपछि लेस्टर दवावमा परेको थियो । उनको स्थानमा जेमी भार्डी मैदान छिरेका थिए ।

खेलको ३८औं मिनेटमा ओउट फेइसले आत्मघाती गोल गरेपछि लिभरपुलले खेललाई १–१ गोलको बराबरीमा ल्याए । एलेक्सान्डर आर्नाेल्डको क्रसलाई क्लियर गर्ने क्रममा ओउट फेइसले आफ्नै पोस्टमा गोल गर्न पुगेका थिए ।

यस्तै, खेलको ४५औं मिनेटमा ओउट फेइसले अर्काे आत्मघाती गोल गरेपछि लिभरपुलले पहिलो हाफमा २–१ को अग्रता लिन सफल भयो ।

डार्विन नुनेजले वान भर्सेस वानको स्थितिमा गरेको प्रहार पोलमा लागेर फर्कदा बललाई क्लियर गर्न पुगेका ओउट फेइसको खुट्टामा लाग्दै गोल हुन पुग्यो ।

यो जितसँगै छैटौं स्थानमा रहेको लिभरपुलको १६ खेलबाट २८ अंक पुगेको छ । पराजित लेस्टर १७ अंक जोडेर १३औं स्थानमा रहेको छ ।