कमालको जित निकाल्दै मोरक्को पुग्यो अन्तिम ८ मा, स्पेन बन्यो स्तब्ध

कतार – उपाधिको बलियो दावेदारको रुपमा हेरिएको स्पेनलाई स्तब्ध पार्दै मोरक्को फिफा विश्वकप कतार २०२२ को अन्तिम ८ मा प्रवेश गरेको छ । टाइब्रेकरमा स्पेनमाथि सनसनीपुर्ण जित निकाल्दै मोरक्को अन्तिम ८ मा पुगेको हो ।

स्पेनलाई टाइब्रेकरमा ३–० ले स्तब्ध पार्दै मोरक्को विश्वकपको इतिहासमा पहिलोपटक क्वाटरफाइनलमा पुग्न सफल भएको छ ।

निर्धारित र थप गरिएको अतिरिक्त समयमा पनि कुनै गोल निस्कन नसकेपछि खेल टाइब्रेकरमा लम्बिएको थियो । त्यसमा मोरक्कोले कमालको जित निकाल्न सफल भयो ।

टाइब्रेकरमा मोरक्कोका अब्देलहामिद साविरी, हाकिम जियाच र अकरफ हाकिमीले गोल गरे । बदर बनोउनेले भने गोल गर्न चुकेका थिए ।

स्पेनका कुनै पनि खेलाडीले टाइब्रेकरमा गोल गर्न सकेनन् । पाब्लो सारावियाको सुरुवाती प्रहार पोस्टमा लाग्यो । त्यसपछि कार्लाेस सोलेर र सर्जियो बुस्केट्सको पेनाल्टीलाई यासिन बोनोले बचाउँदै टोलीलाई अन्तिम आठको यात्रा तय गराए ।