एचआइभीको औषधि सहजै उपलब्ध गराउन माग

काठमाडाैँ । राष्ट्रिय एचआइभी तथा एड्स महासङ्घ नेपालले सहज रूपमा औषधि उपलब्ध गराउन माग गरेको छ।बुधवार महासङ्घको टोलीले राष्ट्रिय एड्स तथा यौन रोग केन्द्रलाई ज्ञापन पत्र बुझाएर सहज रूपमा औषधि उपलब्ध गराउने व्यवस्था गर्न आग्रह गरेको छ।

महासङ्घका अध्यक्ष खगेन्द्र खड्का नेतृत्वको टोलीले सरकारी लापरबाहीले सङ्क्रमितको ज्यान समेत गइरहेको जनाउँदै ध्यानाकर्षण गराएको हो।

सङ्क्रमितहरूले खाने एआरभी वितरणमा केन्द्रले नै अवरोध गरिरहेको उनीहरूको भनाइ छ। जसले गर्दा केही जिल्लामा औषधि नपुगेको र सङ्क्रमितले औषधि खान नपाएको महासङ्घले जनाएको छ।

त्यस्तै, कास्की र सुनसरीमा हेपाटाइटिस–सी भएका सङ्क्रमितको उपचार गर्ने तयारी भएको थियो। तर, केन्द्रकै लापरबाहीले समयमै औषधि नपाउँदा दुई जनाको ज्यान गएको महासङ्घले जनाएको छ।