हर्क साम्पाङले गरे मेयर चढ्ने गाडी बेचेर रोलर मेसिन किन्ने घोषणा !

२४ असार, काठमाडौँ ।

धरान उपमहानगरपालिकाका मेयर हर्क साम्पाङले सरकारी सुविधाको गाडी बेचेर रोलर मेसिन किन्ने घोषणा गरेका छन् । मेयरका लागि भनेर उपमहानगरपालिकाले यसअघि किनेको गाडी बेचेर सडकका खाल्टा टाल्न रोलर किन्न लागेका हुन् ।

मेयर हर्क साम्पाङले सामाजिक सञ्जाल फेसबुक मार्फत मेयरका लागि भनेर किनेको गाडी नगरको विकासका लागि प्रयोग गर्ने घोषणा गरेका छन्। मेयरलाई चढ्न भनेर स्कर्पियो गाडी किनिएको थियो । तर, उनी सरकारी गाडी चढ्दैनन् ।

गाडी बेचेर रोलर किन्ने उनको प्रस्तावलाई बिहीबार बसेको कार्यपालिका बैठकले ताली बजाएर अनुमोदन गरेको छ । उनले फेसबुकमा लेखेका छन्, ‘मेयरलाई भनेर किनिएको स्कोर्पियो गाडी बेचेर धरानको बाटो भरिका खाल्डा टाल्न रोलर मेसिन किन्ने बिचार छ मेरो । आज कार्यपालिकाले ताली बजाएर अनुमोदन समेत गरिदेको छ । जय धरान ।’