फेरी उठ्न छोड्यो काठमाडौंको फोहोर

काठमाडौं महानगरपालिकाको फोहोर उठ्ने छोडेको छ । ढुवानी अबरुद्ध हुने भएकाले दुई दिन उठ्न रोकिने भएको हो ।

बञ्चरेडाँडा ल्यान्डफिल्ड साइट जाने बाटो मर्मत गर्नुपर्ने भएकोले मंगलबार र बुधबार काठमाडौंको फोहोर ढुवानी रोकिने महानगरपालिकाले जनाएको छ ।

तर महानगरपालिकाले फोहोर संकलनमा भने खासै समस्या नहुने बताएको छ । महानगरले यस्तो बताएपनि सडकमा फोहोर देखिन थालेको छ । ‘आज र भोलि बञ्चरेडाँडा ल्यान्डफिल्ड साइट जाने बाटो मर्मत गर्न लागेकोले फोहोर ढुवानी रोकिने भएको छ । केही ठाउँमा फोहोर संकलन पनि रोकिन सक्छ,’ काठमाडौँका मेयर बालेन्द्र शाहको सचिवालयले जनाएको छ ।

काठमाडों महानगरका अनुसार प्रत्येक दिन ३ सय ट्रक फोहोर बञ्चरेडाँडामा खसाल्न सुरु भएता पनि वर्षाले गर्दा बाटो बिग्रँदा १ सय ट्रक फोहोर भन्दा धेरै ल्यान्डफिल्ड साइट लैजान नसक्ने स्थिति रहेको छ ।

बिहीबारदेखि महानगरको फोहोर नियमित रुपमा फेरि बञ्चरेडाँडा जाने महानगरले जनाएको छ ।