नुवाकोटे टाइगरले पाए सर्वाधिक मत !

११ जेठ, काठमाडौँ ।

वैशाख ३० गते सम्पन्न स्थानीय तह सदस्य निर्वाचनमा नेपालका चर्चित रेस्लर नुवाकोटे टाइगर उर्फ कमल तामाङले शिवपुरी गाउँपालिका वडा नम्बर ६ मा सर्वाधिक मतसहित विजयी भएका छन् ।

तामाङले नेपाल नेकपा एमालेबाट विष्णु श्रेष्ठको प्यानलबाट खुल्ला सदस्य पदमा उम्मेदवारी दिएका थिए । तामाङले नेपाली काँग्रेसका अभियान आचार्यलाई २४१ मतको मतान्तरले हराएका छन् ।

उनी नेपालको चर्चित रेस्लर खेलाडी (नुवाकोटे टाइगर) भनेर देश तथा विदेशमा समेत चर्चित रहेका छन् ।

विगत केही वर्ष यता आफ्नो गाउँमा राम्रो र जनताले चाहेको जस्तो राजनीतिक नभएको कारण उनले आफैँ राजनीतिमा लाग्ने निर्णय गरे ।

यस्तै, अध्यक्ष पदमा श्रेष्ठले ७६१, महिला सदस्यमा भगवती बुढाथोकीले ७७०, दलित महिला सदस्यमा जानुका नेपालीले ७६० र खुल्ला सदस्यमा विशाल थापाले ७११ मत प्राप्त गरी विजयी भएका थिए ।

शुक्रवार गाउँपालिकाको कार्यालय शेराबगरमा पदभार ग्रहण गर्दै नागरिकको आवश्यकता अनुसार शिवपुरीको विकासका निमित्त खट्ने नवनिर्वाचित सदस्य तामाङले बताएका छन् ।