भरतपुरका स्वतन्त्र उम्मेदवारले भने: रातभरि धाँधली भयो, दलहरुले सत्ता र शक्तीको दुरुपयोग गरे

आज हुँदै गरेको स्थानीय निकायको चुनावमा भरतपुर महानगरलाई चासोका साथ हेरिएको छ । सत्ता गठबन्धनको तर्फबाट नेकपा माओवादी केन्द्रका अध्यक्ष प्रचण्डकी छोरी रेणु दाहाल सत्ता गठबन्धनको तर्फबाट मेयरको उम्मेदवार छिन । चितवनमा काँग्रेसको तर्फबाट बागी उम्मेदवार भूइँकटहर चुनाव चिन्ह लिएर स्वतन्त्र रूपमा उठेका कारण चुनावलाई चासोका साथ हेरिएको हो ।

यसैबिच भरतपुर महानगरपालिकाको मेयर पदका स्वतन्त्र उम्मेदवार जगन्नाथ पौडेलले आफू विरुद्ध राजनीतिक दलहरुले बिहीबार रातभरि षड्यन्त्र भएको आरोप लगाएका छन् ।

शुक्रबार विहान मतदान गरेपछि पत्रकारहरुसँग कुरा गर्दै उनले भने, ‘मेरो विरुद्ध भरतपुरमा रातभरि षड्यन्त्र भयो, पैसा बाँड्नेदेखि मतदाताहरुलाई प्रभावित गर्ने कामसम्म भयो । राजनीतिक दलहरुले सत्ता र शक्तीको दुरुपयोग गरिरहँदा निर्वाचन आयोग मौन बस्नु एकदम धेरै पक्षपातपूर्ण देखिएको छ ।’

राजनीतिक दलहरुले आयोगसँगको वैठकमा सबै नियम पालना गर्छु भनेर हस्ताक्षर गरे पनि व्यवहारमा नैतिकता शून्य देखिएको पौडेलले बताए ।