एउटै पार्टीबाट नगर प्रमुख र उप-प्रमुखमा पुरुष उठेपछि…

कपिलवस्तु — कृष्णनगर नगरपालिकामा लोकतान्त्रिक समाजवादी पार्टी लोसपाबाट नगर प्रमुख र उपप्रमुखमा पुरुषको मनोनयन दर्ता भएकाले दुवै जनाको उम्मेदवारी निर्वाचन आयोगले रद्द गरेको छ ।

स्थानीय तह निर्वाचन ऐन २०७३ को दफा १७ को ४ विपरीत भएकाले उम्मेदवारी खारेज गरिएको हो । कृष्णनगर नगरपालिकाको नगर प्रमुखमा शिवप्रसाद कलवार र उपप्रमुखमा मोहम्मद अफजल मियाले उम्मेदवारी दिएका थिए ।

कानुन अनुसार नगर प्रमुख र उपप्रमुखमा उम्मेदवारी दिने दलले एक जना महिला र एक जना पुरुष उठाउनु पर्ने भएपनि दुवै पदमा पुरुषले उम्मेदवारी दिएकाले उम्मेदवारी खारेज गरेको जिल्ला निर्वाचन कार्यालयका निर्वाचन अधिकृत ज्ञानुराम पन्थीले बताए ।

त्यसैगरि कृष्णनगर नगरपालिकाको वार्ड नं. २ को दलित महिला सदस्यको उम्मेदवारी दिएकी सबिरा धोबीको पनि उम्मेदवारी रद्द भएको छ । उनले दलित प्रमाणपत्रको निस्सा पेस गर्न नसकेको बताइएको छ । वार्ड नम्बर ९ मा जनता प्रगतिशील पार्टीबाट दलित महिला सदस्यको उम्मेदवार बनेकी सुमिरता रैदासको उम्मेदवारी रद्द भएको छ ।

उनले दलित प्रमाणपत्रको निस्सा पेस गर्न नसकेका बताइएको छ ।