धादिङको मुल सडकमा पाँच जनाको ज्यान गयो

धादिङमा भएको सवारी दुर्घटनामा पाँच जनाको मृत्यु भएको छ । थाक्रे गाउँपालिका–७ जुगेखोलामा बस र कार आपसमा ठोक्किएर भएको दुर्घटनामा कारमा सवार चार भारतीयसहित पाँच जनाले ज्यान गुमाएका हुन् ।

काठमाडौँबाट धादिङतर्फ आउदै गरेको बा ५ ख ८४४३ नम्बरको बसले काठमाडौँतर्फ जाँदै गरेको बागमती प्रदेश ०१–०२६–च २९६८ नम्बरको कारलाई ठक्कर दिएको हो । मृत्यु हुनेमा भारत उत्तरप्रदेशका बिमलचन्द्र अग्रवाल, साधना अग्रवाल, सन्ध्या अग्रवाल, राकेश अग्रवाल रहेका छन् । उनीहरु चारैजना अन्दाजी ३५ देखि ४५ वर्षका छन् ।

दुर्घटनामा कार चालक तनहुँका दिलबहादुर बस्नेतको पनि मृत्यु भएको छ । चालक बस्नेतको काठमाडौस्थित टिचिङ अस्पतालमा उपचारको क्रममा मृत्यु भएको हो ।

सामान्य घुम्ती र उकालो बाटोमा कारले ट्याक्सीलाई उछिन्ने क्रममा बसमा ठोक्किन पुगेको प्रत्यक्षदर्शीहरुले बताएका छन् । बैशाख ७ गते नेपाल आएका उनीहरु आइतबार पोखराबाट काठमाडौँ फर्कँदै थिए । सोमबार काठमाडौँबाट दिल्ली जाने टिकटसमेत भारतीय नागरिकको साथमा फेला परेको प्रहरीले जनाएको छ ।