चितवनका कांग्रेस सभापतिसँग देउवाले भने भरतपुर माओवादीलाई दिनुपर्ने भयो !

कांग्रेसका सभापति तथा प्रधानमन्त्री शेरबहादुर देउवाले चितवनको भरतपुर महानगरपालिकाको मेयर पद छाड्नुपर्ने बताएका छन् । गठबन्धन सहित चुनावमा जाने रणनीतिमा रहेका देउवाले चितवन माओवादीलाई छोड्नु पर्ने बताए सँगै त्यसको जवाफमा चितवन काँग्रेसका सभापतिले चुनावी परिराणामको जिम्मा आफूले लिन नसक्ने बताएका खबर बाहिरिएका छन् ।

मंगलबार चितवन जिल्ला सभापति राजेश्वर खनाललाई प्रधानमन्त्री निवास बालुवाटारमा बोलाएर उनले भरतपुरको मेयर पद माओवादी केन्द्रलाई दिनुपर्ने बताएका हुन् ।

काठमाडौं, ललितपुर र विराटनगर हामीले लिनुपर्ने भयो, भरतपुर माओवादीलाई दिनपर्ने भयो, तपाईंले जिल्लाको माहोल सम्हाल्नुपर्‍यो’ देउवाले खनालसँग भनेका थिए ।

जवाफमा जिल्ला सभापति खनालले जिल्लामा कार्यकर्ताहरु भरतपुर महानगरपालिकाको मेयर छाड्न नहुने पक्षमा रहेकाले आफूले सम्हाल्न नसक्ने बताएका थिए ।

जिल्ला सभापति खनालले भविष्यमा आउने निर्वाचन परिणामको जिम्मेवारी आफूले लिन नसक्ने र त्यसको जिम्मा पार्टी केन्द्रीय सभापतिकै हुने जवाफ दिएको उनले बताए ।  भरतपुरमा काँग्रेस कार्यकर्ता माओवादीलाई मेयर पदका लागि सहयोग नगर्ने मनस्थितिमा छन् ।