एमालेबाट वीरगन्जको मेयरमा सरावगी सर्वसम्मत

नेकपा एमालेबाट वीरगन्ज महानगरपालिकाको मेयरका लागि विजय सरावगीको नाम सर्वसम्मत रूपमा सिफारिस भएको छ। अहिले पनि वीरगन्जका मेयर रहेका सरावगीलाई वैशाख ३० गते हुने चुनावका लागि एमाले नगर कमिटीले बुधबार सर्वसम्मत रूपमा सिफारिस गरेको हो।

संघीय समाजवादी पार्टीबाट २०७४ मा मेयर चुनाव जितेका सरावगी गत फागुनमा एमाले प्रवेश गरेका थिए। उनलाई पार्टी प्रवेश गराउन एमाले अध्यक्ष केपी शर्मा ओली वीरगन्ज पुगेका थिए।

सरावगीले मेयरका लागि आफ्नो नाममात्रै सिफारिस भएको बताए। अरू कोही आकांक्षी नभएपछि आफ्नो नाम सर्वसम्मत भएको उनले बताए। उपमेयरका लागि भने उम्मेदवार सिफारिस गर्न बाँकी छ। लोकतान्त्रिक समाजवादी पार्टीसँग तालमेलको कुरा भइरहेकाले उपमेयरको उम्मेदवार सिफारिस हुन ढिलाइ भएको सरावगीले बताए।

मेयर सरावगी गत महिना नेकपा एमालेमा प्रवेश गरेका थिए । २०७४ सालको स्थानीय तह निर्वाचनमा भने उनी तत्कालिन संघीय समाजवादी फोरमबाट मेयरमा निर्वाचित भएका थिए ।