सरकारले जारी गर्यो कोभिड खोप बारे नयाँ नियम, बुस्टर खोपका लागि ६ महिना कुर्नु नपर्ने !

काठमाडौं, २० चैत्र ।

अब कोभिड–१९ विरुद्धको खोपको पहिलो श्रृंखला पुरा गरेको ३ महिनापछि बुस्टर खोप लगाउन पाइने भएको छ ।

यसअघि खोपको पहिलो श्रृंखला पुरा गरेको ६ महिना पछि मात्र बुस्टर खोप लगाइदै आएकोमा राष्ट्रिय खोप सल्लाहाकार समितिको गत चैत्र १३ को सिफारिशको आधारमा स्वास्थ्य मन्त्रालयको परिवार कल्याण महाशाखाले पहिलो श्रृंखला पुरा गरेको ३ महिनामै खोप दिने निर्णय गरेको हो ।

साथै मन्त्रालयले खोप लगाउन छुटेका नागरिकहरुलाई तोेकिएको खोप केन्द्रहरुबाट निरन्तर पहिलो तथा बुस्टर खोप लगाउन पनि आग्रह गरेको छ ।

महाशाखाले सबै प्रदेशको स्वास्थ्य निर्देशनालय र ७७ वटै जिल्ला स्वास्थ्य कार्यालयलाई पत्राचार गरी पहिलो श्रृंखलाको खोप पूरा गरेको तीन महिनामै बुस्टर डोज दिन आग्रह गरेको छ ।