पार्टीका तल्ला समितिसँग राय लिएपछि मात्रै चुनावी तालमेलबारे निर्णय हुन्छ: सिंह

नेपाली कांग्रेसका पूर्वमहामन्त्री प्रकाशमान सिंहले वैशाखमा हुने स्थानीय चुनावमा अन्य दलसँग तालमेल गर्ने वा नगर्ने भन्ने निर्णय पार्टीका तल्ला समितिसँग सल्लाह गरेर मात्रै तय गरिने बताएका छन्।

सातै प्रदेश कार्यसमितिसँग राय लिएर मात्रै चुनावी तालमेलबारे निर्णयमा पुगिने सिंहको भनाइ छ।

काभ्रेको धुलिखेलमा आज आयोजित पत्रकार सम्मेलनमा उनले चुनावी तालमेलका बारेमा निर्णय गर्नका लागि सवै तहका कार्यसमितिहरुसँग राय लिइने बताएका हुन्।

‘प्रदेश तथा पार्टीका तल्ला कार्यसमितिसँग राय लिएर मात्रै चुनावी तालमेलबारे निर्णयमा पुगिन्छ,’ उनले भने। उनले प्रतिगमन रोक्न गठबन्धन बनेकोले त्यसको निरन्तरता हुने पनि बताएका थिए।