अन्ततः एमसीसी सामु माओवादी-समाजवादी परे लम्पसार, आजै अनुमोदन गर्ने सत्ता गठबन्धनको निर्णय

पाँच दलीय सत्ता गठबन्धनले ब्याख्यात्मक घोषणासहित आजै अमेरिकी सहयोग सम्बन्धी सम्झौता एमसीसी पारित गर्ने निर्णय गरेको छ ।

एमसीसी अनुमोदन हुनै सक्दैन भन्दै आएको प्रचण्ड नेतृत्वको एकीकृत माओवादी एमसीसीलाई व्याख्यात्मक तरिकाले पास गर्ने निर्णयमा पुगे सँगै एमसीसी आजै सदनबाट पारित हुने भएको हो ।

प्रधानमन्त्री निवास वालुवाटारमा आज बिहान बसेको सत्ता गठबन्धनको बैठकले ब्याख्यात्मक घोषणासहित एमसीसी संसदबाट अनुमोदान गर्ने निर्णय गरेको नेपाली कांग्रेसका बरिष्ठ नेता रामचन्द्र पौडेलले जानकारी दिए ।

अहिलेकै अवस्थामा जस्ताको तस्तै एमसीसी अनुमोदन हुनै सक्दैन भन्दै आएका प्रचण्ड लगायत नेताहरू एमसीसीको पक्षमा देखिए सँगै आजै संसद्बाट एमसीसी अनुमोदन हुने भएको हो ।

सत्ता साझेदार माओवादीले व्याख्यात्मक टिप्पणी सहित एमसीसीलाई सदनबाट पास गराउने निर्णय गरेका थिए ।

अहिले एकीकृत समाजवादीको स्थायी कमिटी बैठक जारी छ । सत्ता गठबन्धनको बैठकमा भाग लिएका समाजवादी अध्यक्ष माधव नेपाल पनि एमसीसीलाई व्याख्यात्मक तरिकाले पास गराउने लाईनै रहेको स्रोतको दाबी छ ।

सत्ता गठबन्धनको बैठकअघि आज बिहान बसेको नेकपा माओवादी केन्द्रको कार्यालयको विस्तारित बैठकले एमसीसीलाई ब्याख्यात्मक घोषणासहित अनुमोदन गर्ने निर्णय गरेको थियो ।