ललितपुरमा घरबाहिर निस्किँदा अनिवार्य मास्क प्रयोग गर्न निर्देशन

विश्वव्यापी फैलिएको कोरोना भाइरसको प्रभावलाई मध्यनजर गर्दै जिल्ला प्रशासन कार्यालय ललितपुरले कोभिड–१९ को सङ्क्रमण बढ्दै गएको भन्दै सार्वजनिक स्थलमा मास्क अनिवार्य प्रयोग गर्न अनुरोध गरेको छ ।

प्रशासनले मंगलबार राति १२ बजेदेखि अर्को सूचना जारी नहुन्जेलसम्म घरबाहिर वा सार्वजनिक स्थलमा निस्किँदा सबैले मास्कको प्रयोग अनिवार्य गर्नुपर्ने निर्णय गरेको हो ।

प्रशासनले भौतिक दुरी कायम गर्न, समय समयमा साबुन पानीले हात धुन वा सेनिटाइजरको प्रयोग गर्न पनि अनुरोध गरेको छ ।

पछिल्लो समय बढ्दै गएको कोरोना भाइरसको प्रभावलाई मध्यनजर गरेर सरकारले समेत स्वास्थ्य मापदण्ड कडाइका साथ पालना गर्न निर्देशन दिइसकेको छ ।

भारतमा दिन दुई गुणा रात चौ गुणा जसरी कोरोनाको सङ्क्रमण दर बढ्दै गए पछि नेपालमा पनि खुला सिमानाका कारण सङ्क्रमण दर बढ्दै गएको छ ।

बढ्दै गएको कोरोना भाइरसको सङ्क्रमण दर लाई मध्यनजर गर्दै ललितपुर जिल्ला प्रशासन कार्यालयले मास्क अनिवार्य लगाउनु पर्ने निर्णय गरेको हो ।