पूर्वडिआइजी रमेश खरेलको नेतृत्वमा ४७ सदस्यीय ‘नेपाल सुशासन पार्टी’ निर्वाचन आयोगमा दर्ता

पूर्वडिआइजी रमेश खरेलको नेतृत्वमा ४७ सदस्यीय नेपाल सुशासन पार्टी निर्वाचन आयोगमा दर्ता भएको छ।

बुधबार उक्त पार्टीले निर्वाचन आयोगबाट दर्ता प्रमाण-पत्र पनि लिएको छ। सुशासन पार्टीको अध्यक्षमा खरेल, पाँच उपाध्यक्षमा राजकुमार यादव, चन्द्रवीर नेम्वाङ, गोविन्दप्रसाद रिजाल, शंकरलाल श्रेष्ठ र टुलराज बस्याल रहेका छन्।

महासचिवमा गोविन्द गिरी रहेका छन्। बहुपदयी संरचनाको सुशासन पार्टीमा पाँच सचिव छन्।

सचिवहरूमा यज्ञप्रसाद बस्याल, राजन चौलागाईं, विनयकुमार झा, अरुण शर्मा र पुष्पा खरेल भट्ट छन्। कोषाध्यक्षमा भक्तबहादुर केसी र सहकोषाध्यक्षमा मिनकुमार श्रेष्ठ रहेका छन्।

अध्यक्ष खरेलले बिहीबार विज्ञप्ति जारी गरी सुशासन पार्टीले हिमाल, पहाड, तराई, मधेसको सन्तुलित सद्भाव र विभेदरहित समाज निर्माण, समन्यायिक सेवामा जोड दिने बताए।

‘राजनीति सेवा हो पेशा होइन भन्ने कुरा सुशासन पार्टी दृढ रहने छ,’ जारी विज्ञप्तिमा भनिएको छ, ‘छिट्टै घोषणा सभामार्फत् आफ्ना सिद्धान्त, विचार र उद्देश्यहरू जनतामाझ राख्ने तयारी छ।’

खरेलले गत मंसिर २४ गते नेपाल सुशासन पार्टी गठन गरेको जनाएका थिए।