ओमिक्रोनपछि कोरोनाको अर्को एउटा भेरियन्ट भेटियो, ४६ पटक फेरिसकेको छ रुप

कोरोना संकटबीच अर्को एउटा चिन्ता बढाउने खबर आएको छ । ओमिक्रोनपछि वैज्ञानिकले कोरोनाको अर्को एउटा भेरियन्ट (भेरियन्ट आइएचयू) बारे पत्ता लगाएको छ । जानकारीका अनुसार भेरियन्ट आइएचयूले ४६ पटक रुप फेरिसकेको छ ।

यो मूल कोभिड भाइरसको तुलनामा खोप प्रतिरोधी र संक्रामक हुनसक्ने अनुमान गरिएको छ । डेली मेलका अनुसार भेरियन्ट आइएचयू फ्रान्समा भेटिएको हो । फ्रान्सको मारसेलमा यो नयाँ भेरियन्टका १२ संक्रमित भेटिएका छन् । उनीहरु अफ्रिकी देश क्यामरुनबाट फर्किएका थिए ।

हाल भेरियन्ट आइएचयू कति घातक र संक्रामक हुनेछ, त्यो भने स्पष्ट छैन किनभने हाल फ्रान्समा ओमिक्रोन भेरियन्टको कहर छ । कोरोना संक्रमितमध्ये ६० प्रतिशत ओमिक्रोनका संक्रमित छन् । यो भेरियन्टलाई मेडिटेरानी इन्फेक्सन फाउन्डेशनले १० डिसेम्बरमा भेटेको थियो । राहतको कुरा के छ भने हाल भेरियन्ट आइएचयू तीब्र रुपमा फैलिएको भने छैन ।

यो भेरियन्ट अन्य देशमा पनि फैलिएको बारे अनुसन्धान गर्न बाँकी नै छ । भेरियन्ट आइएचयूलाई B.1.640.2 पनि भनिएको छ । यो सेप्टेम्बरमा कंगोमा भेटिएको भेरियन्ट B.1.640 भन्दा भिन्न भएको बताइएको छ ।