वर्षाले आन्तरिक उडान प्रभावित : पोखरा, लुक्ला र नेपालगञ्जमा उडान हुन सकेन

मौसममा आएको बदलावका कारण आन्तरिक उडान प्रभावित भएको छ । सोलुखुम्बुको लुक्ला, नेपालगञ्ज र कास्कीको पोखरामा उडान हुन सकेको छैन ।

भिजिबिलिटी कम भएका कारण आन्तरिक तर्फका ३ वटा विमानस्थलमा उडान हुन नसकेको त्रिभुवन अन्तर्राष्ट्रिय विमानस्थल नागरिक उड्डयन कार्यालयका महाप्रबन्धक भोला प्रसाद गुरागाईँले रातोपाटीलाई बताए ।

अन्तर्राष्ट्रिय उडान र आन्तरिकतर्फका अरू उडानमा समस्या नभएको गुरागाईंले बताए । लुक्लामा ५ सय मिटर मात्रै भिजिबिलिटी छ । पोखरामा ३ हजार मिटर भिजिबिलिटी छ ।

बिहानै देखि परेको वर्षाका कारण उडान हुन नसक्दा आन्तरिक उडान प्रभावित भएका हुन । गन्तव्यमा पुग्नको लागि बिहानै विमानस्थल पुगेका यात्रु हरू विमानस्थलमै उडानको पर्खाइमा छन् । मौसम सफा हुनासाथ विमान सुचारु हुने जनाइएको छ ।

वर्षा सँगै काठमाण्डौमा चिसो समेत बढेको छ ।  वरिपरिका डाडा हरुमा हिमपात समेत भएको छ ।